尹光你老闆

提起尹光，你會知道他有個外號叫「廟街歌王」，會記起他曾高唱「雪姑七友七個小矮人，雪姑七友七個齊齊瞓」，因而認定他的歌曲意淫市井，難登大雅之堂，其實他歌曲風格雖然另類，歌詞中卻不乏諷刺時弊之作，道出小市民的生活境況，近年香港問題多多，令尹光因此愈來愈紅。

事實上，尹光的歌曲可算是反映香港問題的指標，他早年以一曲《十四座》，道出職業小巴司機搵食之苦，又以一首《關人隱士》，表現香港市民對九七回歸的不安，以至千禧年後的《少理阿爸》與《霹靂無敵334》，就分別帶出香港問題家庭下的青少年問題，以及334學制改革。

他將於下月4及5日一連兩晚開演唱會，主題曲就大唱年輕人要蝸居劏房與靠父母的現況：「啲樓愈賣愈貴，焗住愈住愈細，大學畢業出嚟，咪又係捱騾仔，你話家吓啲後生仔，邊敢結婚生仔，為咗生計，做到痴肺」，一句句歌詞「么心么肺」，恐怕更是不少八十後年輕人的心聲。

尹光接受老紀專訪，這個見盡70年代至今香港風光的市井歌王，坦言活在昔日的香港，比現時更為開心，「以前生活簡單，努力做嘢賺錢好好使，但現時做到死都唔夠使，內地人來香港搶貴晒啲嘢，令到草根好艱難；年輕一代仲同父母住，要靠父母，因為租咗樓，點結婚？」

尹光這首率先曝光的新歌，歌名貫徹其市井風格，名為《你老闆》，歌中既談時下的老闆，更多提及時下年輕人的生活實況，開首兩句是「我唔係求財，我只係求存」，之後的歌詞更是一針見血：「正所謂愈窮就愈見鬼，啲樓愈賣愈貴，焗住愈住愈細，大學畢業出嚟，咪又係捱騾仔，你話家下啲後生仔，邊敢結婚生仔，為左生計，做到痴肺，月底，剩到錢追女仔，算你巴之閉，權宜之計，就係瞓天橋底，冬涼夏暖，仲免交管理費。」

《你老闆》連串的歌詞，提及高樓價、發水樓、滿街大學生、港人遲婚、月光族及無力置業等，同時正是現時最新鮮滾熱辣的社會問題，在歌曲後半這一段：「乜都唔駛撈，離開呢度，搬去瓦努阿圖，搵唔到喎摷勻地圖，焗住留守喺香港，跟住一齊講I love Hong Kong，繼續屈喺間房，逼過監倉，繼續畀業主監生劏，咁貴租間板間房，不如攞啲錢去橋底度，買塊板，間房」，更非常的「與時並進」，皆因最代表本港基層工人的工聯會立法會議員陳婉嫻，在本月中才「忽發奇想」，提議發展本港行車天橋及行人天橋的橋底空間，利用貨櫃箱改建臨時房屋，似乎「瞓天橋底」與「去橋底度，買塊板，間房」，隨時不止是歌詞，更是對現實的無比諷刺。

其實，以歌曲諷刺時弊，從來都是尹光手到拿來的風格，他早在1974年時，便有一首唱得街知巷聞的《十四座》：「我真真折墮，我揸架十四座……受盡多條嚴禁例，兜客難兜禁區多蘿蘿」，道出職業小巴司機搵食艱難的實況；至於後來的《一個黐膠線的少年》，歌詞一段是「有個少男，佢忠心可靠，誠實謙虛心地好，人又有禮，品性敦厚，咁好青年極少有……勤力到痺，分秒工作，縱使超時沒嗟嘆」，正正反映當時香港經濟起飛，勞動階層望以勤奮來換取讚賞報酬的現實。

及至2002年，尹光憑一首繞舌歌《少理阿爸》橫掃的士高場所，同時令他吸納一班年輕的潮人當「粉絲」，該曲帶出香港有不少問題家庭，因而衍生如濫藥等青少年問題，縱然歌詞露骨，卻是道出了不少人不願承認的事實。

「廟街歌王」嘆百物騰貴

尹光有「廟街歌王」之稱，令人以為他因為早年在廟街唱歌搵食而得名，但不說不知，原來他從未曾在廟街唱歌，而獲得「歌王」美譽，全因他的歌曲歌詞用字較為粗俗，故市面上的唱片店較少售賣，反而只有在廟街等地方才可找到。

然而，歌曲似是兒童不宜，但尹光的歌曲同時猶如是香港社會變遷的寫照，究竟這個唱盡七十年代至今社會問題的歌手，又如何看今天和過去香港的變化？

「我覺得以前生活開心啲，以前生活好好，七十年代我每月搵400至500蚊，當年一般打工仔月入約300元，我就算用100蚊來租房，淨番啲錢都仲好好使，但而家後生一代，就算月入有萬五元，咩都貴，食又貴租又貴，根本唔夠使。」尹光接受老紀專訪時慨嘆，「以前免費娛樂多，去吓廟街女人街落吓大笪地，唔使點消費，現時冇呢支歌仔唱。」

對於他將會在演唱會大唱「劏房歌」，他認為歌詞是反映社會的問題，也反映年輕一代香港人的無奈，「佢哋父母仲養得起佢哋，所以仲可以靠家庭，但再將來呢？點租樓？點結婚？現時好多年輕人係月光族，儲唔到錢，我哋嗰一代，以前就算點使錢，每個月唔儲100都儲50蚊，但現時年輕人真係冇㗎，但又唔怪得佢哋，因為真係唔夠用。」

尹光出道之時，正值香港經濟開始高速發展，雖然未至於遍地黃金，但機會肯定較現時多，連講買樓置業，難度更是天壤之別，「我第一次買樓時，一個單位先15、16萬，打工仔儲兩年錢已經儲到首期，家陣你就算儲到錢，分分鐘唔及兩年間升咗嘅樓價，追唔到樓價升幅，仲有喎，當年的單位，成900至1000平方呎，邊似現時咁細；我當年爛賭，試過一晚就輸咗層樓，但我咪努力啲去唱，一晚去唱9場，一場收幾百，一晚搵埋都幾千蚊，起碼我有個希望，所以好快就還晒賭債，但換咗今日，都冇咁多機會，所以只可以破產。」

至於現時香港經濟似乎不錯，理論上生活質素應更勝當年，但尹光卻搖着頭表示不認同，「現時草根階層生活得好艱難，雖然好多內地旅客來香港，好似幫到香港經濟，但只係益咗啲名牌（老紀按：自由行旅客掃名牌），佢哋搶貴晒啲嘢，舖租貴咗好多，有朋友做生意，盤生意剛剛守到，業主就話加雙倍租，市面已經冇晒平嘢賣，周圍啲樓又起到密質質，空氣又差，仲搵食艱難，社會仲連人情味都冇埋。」

資料來源