自去年3月在網上留言「Love=Money」後，賭王三房長女何超雲狠撇年長12年的無綫藝員陳山聰，感情生活亦轉趨低調，絕少公開暢談戀事。反觀「失雲聰」經過一輪閉關，復工出山後不時笑談「雲」事，今年2月更以「戰鬥格」跑畢馬拉松全馬賽，似乎早已跨過失戀情傷。分手後的超雲痛定思痛，有感昔日蜜運時與山聰不停食好住好，令體重持續上升，「甩聰」後下決心減磅「甩脂」！
經過一番苦功，分手一周年後「索雲」重現，準備再覓良緣！
超雲昨午陪伴三太陳婉珍出席東華三院董事局就職典禮，身穿碎花露腰連身裙的超雲大騷背部纖腰，長腿與手臂亦纖瘦不少，比過往脹爆期時明顯清減，配上淡妝索氣逼人！雖然見記者時友善揮手，但她未有接受訪問，最後只企定定大方任影後便轉身離開。
靠運動食得清淡
晚上，超雲與弟弟猷啟再陪伴三太出席東華三院董事局聯歡晚宴，換上高貴黑色低胸長裙的超雲露出銷「雲」鎖骨，性感打扮令全場閃光燈閃個不停！她繼續保持低調，在公關開路下入場，未有接受記者訪問。
不過，猷啟受訪時踢爆姊姊超雲激減廿磅、追求者無數！問到姊姊愈來愈Fit時，猷啟說：「佢努力減肥啦我諗。（瘦咗幾多？）我估20磅啦！佢食嘢清咗，努力做運動，成日喺屋企跑步。」問到「索雲」現時是否很多人追？他笑說：「唔知喎！佢一向都多人追。」
另外，猷啟正忙於打理母親三太公司業務，問到最近有否「大搞作」，他說：「OK啦！冇咩特別。（自己做生意？）等多啲經驗先啦！（依家全力幫媽咪手？）係呀！做咗都差唔多一年。」
