由於胡鴻鈞由出道塊面起晒角，到依家變到V煞面嘅過程，實在令高登一眾巴打嘖嘖稱奇，戲稱佢係「削骨還父」，孝義感動網民，不過網民早排去佢Instagram度寸佢，有網民就話胡鴻鈞係咁刪走啲留言，令佢哋好不滿。
上星期日(23號)胡鴻鈞去到荃灣睇籃球賽，就俾記者捉住係咁影多角度相片，搞到佢話:「俾你摸吓喇!」
再問佢網民鬧爆佢刪留言，佢就話:「我冇刪過任何留言，聽朋友講如果有投訴，官方可能刪除留言，我點敢得罪班巴打呀!」
不過講到入圍高登男神，佢都話:「都想攞第一㗎!聽講贏咗之後會豬籠入水。」好啦，又問返佢有冇整容呢個問題，佢依然否認:「邊有時間整，要整都唞返幾個月啩?...我諗化妝好大關係，我係有同化妝師溝通...又keep住一星期跑2-3次步，都有影響嘅。」
早前揚言如果整容會驚阿媽斬，呢日佢繼續話:「阿媽都有懷疑我整過，有日返屋企，佢走過嚟捽我塊面，仲好仔細咁檢查，之後就讚我靚仔咗。」
不過網民笑佢阿媽點解會斬佢，係因為佢淨係「削骨還父」，冇「削肉還母」，所以唔開心囉!
